Amdanom

Cartref, cymuned, hapusrwydd.

Mae’r berthynas rhwng y tri pheth hyn ar feddwl Kristina Banholzer ers tro, perchennog cwmni Catra. A hithau wedi setlo yn Felinheli, ble mae hi a’i phartner yn magu eu dau o blant ifanc, mae Kristina wedi mwynhau bod yn rhan o grŵp cymunedol sy’n trefnu digwyddiadau yno, gan weld budd ac effeithiau cadarnhaol dod â phobl o wahanol oedrannau a chefndiroedd ynghyd.

Gyda mwy a mwy o ymchwil yn dangos mai perthnasau a theimlad o berthyn yw un o’r prif bethau sy’n ein gwneud yn hapus, dechreuodd Kristina feddwl tybed oedd ffordd o gadw hyn mewn cof wrth werthu ein cartrefi. Oes ffordd o sicrhau bod prynwyr yn cael gwybod nid yn unig sut fath o fywyd sy’n bosib yn y cartref hwn, ond hefyd wrth fod yn rhan o’r gymuned leol?

A dyna sefydlu Catra: gwerthwr tai sy’n gwneud y daith o werthu eich cartref yn un hawdd, ystyriol, ac agos atoch chi, gan roi cyfle i unrhyw ddarpar berchennog weld y cyfoeth o gyfleoedd sydd o fewn eu cymuned newydd, boed hynny’n grwpiau llesiant, yn fusnesau annibynnol neu’n ofodau i gymdeithasu.

Gyda dros degawd o brofiad yn gweithio’n llawrydd fel ffotograffydd, mae Kristina hefyd yn defnyddio ei sgiliau ffotograffiaeth i ddangos pob cartref ar ei orau, gan adlewyrchu naws ac egni unigryw eich cartref ym mhob llun.

Pam mae cartrefi mor bwysig i mi

Cyn dod yn asiant tai, fues i’n gweithio fel ffotograffydd dogfennol am dros ddeng mlynedd.

Dysgodd ffotograffiaeth i mi mai’r straeon mwyaf ystyrlon yw’r rhai sydd i’w gweld yn y manylion bach. Hoff gadair wrth y ffenestr. Esgidiau mwdlyd wrth y drws cefn. Bwrdd y gegin sydd wedi gweld blynyddoedd o brydau teuluol. Y pethau bach yma sy’n dweud stori cartref, yn dawel bach.

Pan sefydlais Catra, sylweddolais nad oeddwn wedi gadael ffotograffiaeth ar ôl o gwbl. Roeddwn i wedi dod o hyd i ffordd newydd o adrodd straeon pobl.

Heddiw, mae pob cartref rwy’n ei ffotograffu, pob disgrifiad rwy’n ei ‘sgwennu a phob ymweliad rwy’n ei chynnal yn dechrau yn yr un ffordd – gyda chwilfrydedd. Rwy’n awyddus i ddeall beth sy’n gwneud cartref yn arbennig i’r bobl sy’n byw ynddo, cyn helpu rhywun arall i syrthio mewn cariad ag ef.